Tuesday, March 7, 2017

के म बिर्सन सकुँला?

हुन्छ तिमीले भने जस्तै म बिगतका सबै कुरा बिर्सुला 
तर,
खेतमा हलो जोत्दै गरेको उसलाई उनीहरुले किन पक्रेर लगे?
किन त्यो दिनसम्म 'भोट हाल्नुपर्छ' बाहेक राजनीतिको क, ख रा समेत नजानेको 
उसलाई आतंककारिको बिल्ला भिराएर झुठा 'मुठभेड' मा मारियो 
त्यसको जवाफ पहिला देउ 

हुन्छ तिमिले भनेको जस्तै म पनि अगाडी बढुला 
शान्त र समुन्नत देशको निर्माण गर्न 
तर,
जनताको लागि भन्दै 
गाउँमा ज्ञानको ज्योति छर्दै गरेको उसलाई 
'जासुस' को आरोप लगाई किन रुखमा झुड्यायौ 
उनको छातीमा छुरा रोप्ने र घटीमा रसी कस्ने को थिए 
अनि त्यसो गर्न लगाउने को थिए 
त्यसको जवाफ देउ पहिला 

हुन्छ तिमीले भनेको जस्तै बिगत कोट्याएर तिम्रो 'शान्ति' भंग नगरुला म
तर,
सरकारी कार्यालयमा तारेख धाउन गएको उसलाई पक्रेर बेपत्ता पार्ने 'राज्य'हरुलाई  
मेरो सामु ल्याएर किन त्यस्तो गर्यो भन्ने कुराको चित्त बुझ्दो जवाफ दिन लगाउ 
अनि मलाइ चित्त नबुझे उसलाई कारवाही गर्छु
भन्ने विश्वास दिलाउ पहिला 

हुन्छ तिमीले भनेको जस्तो आर्थिक क्रान्तिमा म पनि सामेल होउला 
तर
राजनीतिक क्रान्तिको नाममा साधारण यात्रामा रहेका उनीहरुलाई 
किन महान यात्रामा सामेल हुन् बाध्य बनायौ बसमा बिस्फोट गराएर ?
त्यसको उपादयता पुष्टि गर पहिला 

यो पनि हुन्छ कि तिमीले भनेको जस्तो 
म पनि मेलमिलाप गरेर गरेर बसौला समाजमा 

तर,
त्यो भन्दा पहिला 
उनीहरुलाई खाना र बस्न नदिएको निहुमा मेरो बुबाको खुट्टा भाच्नेलाई मेरो सामु घुडा टेक्न लगाउ 
उनीहरुलाई बास र खाना दिएको निहुमा आगनमा निकालेर तातो गोलि खुवाउनेलाई कारबाही गर 
जो आज मेरै समाजमा हाम्रै अगाडी छाती फुलाएर हिडेका छन् 
हाम्रो छाती चिरिन्छ हजुर तिनको चुरीफुरी देख्दा

छ हिम्मत र चाहना यत्ति गर्न?
यदि छैन भने
तिम्रो मेलमिलापको बेसुरा आलापले सुनको जलप लगाएर फलामलाई सुन हो भन्नु बाहेक केहि गर्दैन 
सक्छौ मल्हम लगाउ, सक्दैनौ घाउ नकोट्याउ 
तिम्रा हिजोका आश्वासान र आजको बेवास्ताले
तिमि प्रतिको विश्वास ढलेको छ
त्यसैले
कृपा गरेर अब मलाइ नसोध कि म के चाहन्छु
अब त मेरो घाउ मेरो छोरा छोरीलाई दुख्दै छ
ए हजुर !
म त जेनतेन आफ्नै आशु पिएर बाचे
तर मेरा छोराछोरी आफ्नो आशु हैन
तिनका खुन पिउने बन्न नसक्लान भन्न म सक्दिन
तिम्रा बन्द दिमाग र आखा खोल बेलैमा

नत्र तिमि निन्द्राबाट ब्युझदा स्थिति अर्कै हुन सक्छ !